चितवन । जनकल्याण माध्यमिक विद्यालय, कल्याणपुरले दुई दशक बढी शिक्षण गरी निवृत्त हुँदै वडाध्यक्ष निर्वाचित शिक्षक दीपेन्द्रराज पौडेललाई सम्मान गरेको छ ।
विहीबार विद्यालय प्राङ्गणमा सम्पन्न एक कार्यक्रमबिच विद्यालयले २२ वर्षको शिक्षण सेवा पश्चात निवृत्त हुनुभएका हाल माडी ६ का वडाध्यक्ष पौडेललाई सम्मान गरेको हो । त्यस्तै, शैक्षिक बर्ष २०७८ मा उत्कृष्ट नतिजा ल्याउने नर्सरी देखि ११ सम्मका २८१ जना विद्यार्थीहरुलाई पनि सम्मान गरिएको शिक्षक दीपनाथ आचार्यले जानकारी दिनुभयो ।
त्यसैगरी माडी नगर स्तरीय परीक्षामा सर्बोत्कृष्ट नतिजा ४ जी.पी.ए. ल्याउने विद्यार्थीद्वय सौगात पोख्रेल र सनिसा विकलाई समेत सम्मान गरिएको थियो । विद्यालय व्यवस्थापन समितिका अध्यक्ष श्याम कुमार विष्टको अध्यक्षतामा सम्पन्न कार्यक्रमको प्रमुख अतिथि माडीका नगर उपप्रमुख खेमप्रसाद महतो रहनुभएको थियो । कार्यक्रममा स्वागत मन्तब्य विद्यालयका प्रधानाध्यापक राम बहादुर जि.सी.ले राख्नुभएको थियो ।