चितवन । माडीको घोसरी गाउँमा खुकुरी प्रहार गरी एकजनाको हत्या गरेको अभियोगमा माडी प्रहरीले मृतककै साथी रहेका एक युवकलाई पक्राउ गरेको छ ।
माडी-४, घोसरीमा राती करीब १० बजे खुकुरी प्रहार गरी बर्ष ३३ का जीवन नेपालीको हत्या गरेका नवलपरासी निवासी अन्दाजी बर्ष ३४ का एक पुरुष माडी-३, ईनारबरुवा गाउँबाट पक्राउ परेका हुन् ।
घोसरीस्थित नेपालीको घरमा बसेर संगै मद्यपान गर्ने क्रममा विवाद भएपछि नेपालीको टाउकोमा खुकुरी प्रहार गरेको उनले स्वीकारेको माडी प्रहरीले जनाएको हो ।
नेपालीमाथि खुकुरी प्रहार गरेर भाग्ने क्रममा उनले घोसरी गाउँमै घरमा सुतिरहेकी एक महिलाको गहना समेत लुटपाट गरेका थिए । माडी प्रहरीले केहि घण्टामै घटनाका आरोपीलाई पक्राउ गरी भरतपुर चलान गरेको हो ।
घटनास्थलमा अत्यधिक रक्तश्राव भएको र भुईंमा घोप्टिएको अवस्थामा नेपालीको शव भेटिएको थियो । शवको छेउमा रगत लतपतिएको अवस्थामा खुकुरी पनि भेटिएको थियो । घटनाका कारण घोसरी गाउँ र वरपर शोक छाएको छ । (तस्वीरः घटनास्थलमा मृतक नेपालीको शव)
