चितवन । चितवन राष्ट्रिय निकुञ्जले बाघको आक्रमणमा परी मृत्यु भएका माडी भैरवपुरका सुर्यनाथ अधिकारीको परिवारलाई राहत स्वरुप १० लाख रुपैंया उपलब्ध गराएको छ ।
दिवंगत अधिकारीको माडी-२, भैरवपुरस्थित निवासमै पुगी निकुञ्जका प्रमुख संरक्षण अधिकृत हरिभद्र आचार्यले १० लाख रुपैंयाको चेक प्रदान गर्नुभएको हो ।
रकम हस्तान्तरण कार्यक्रममा निकुञ्जका सहायक संरक्षण अधिकृत एवं प्रवक्ता गणेश प्रसाद तिवारी, पाँचपाण्डव मध्यवर्ती उपभोक्ता समितिका अध्यक्ष नारायणदत्त सापकोटा (बासु) र अन्य पदाधिकारीहरु सहभागी रहनुभएको थियो ।
यसअघि गत भदौ २५ गते शनिवार गाईबस्तु चराउन अमिलिया क्षेत्रमा पुगेका ५५ बर्षका अधिकारीको बाघको आक्रमणबाट मृत्यु भएको थियो ।
चरनमा गएका गाईबस्तु साँझपख घरमा फर्किएपनि चराउन गएका अधिकारी घर नफर्किनुभएपछि खोजीमा गएको टोलीले भोलिपल्ट बिहान उहाँको शव भेटेको थियो ।
