चितवन । डेढ दर्जन मानिसहरुको ज्यान लिइसकेको कुख्यात ध्रुबे हात्तीको आक्रमणबाट पश्चिमी चितवनमा एक बृद्धाको मृत्यु भएको छ ।
ध्रुवेको आक्रमणबाट शनिबार भरतपुर महानगरपालिका-२८ अन्द्रौलीकी ७८ वर्षीय भागिरथी सुवेदीको मृत्यु भएको हो ।
घरको आँगनमा आगो तापिरहेको अवस्थामा ध्रुवेले एक्कासी आक्रमण गरेकोमा घाइते हुनुभएकी सुवेदीको भरतपुर अस्पतालमा उपचारका क्रममा मृत्यु भएको जिल्ला प्रहरी कार्यालय चितवनले जनाएको छ ।
चितवन राष्ट्रिय निकुञ्जका सूचना अधिकारी गणेशप्रसाद तिवारीका अनुसार सुवेदीलाई जंगली ध्रुवे हात्तीले आक्रमण गरेको हो । ध्रुवेको पछाडि प्राविधिक टिम खटिएपनि अप्रिय घटना हुन पुगेको उहाँले बताउनुभयो ।
केहि दिनअघि निकुञ्जको ध्रुव पोष्ट नजिक ध्रुवे हात्तीले मोटरसाइकलमाथि आक्रमण गरेको थियो । मोटरसाइकल चालक भागेर बाँच्न सफल भएपछि मोटरसाइकलमा भने क्षति पुगेको थियो ।
