माडी, चितवन । माडीको मगुही खोला पुल निर्माणका ठेकदार पक्षले यही बर्ष जेठ मसान्तभित्र पुल सञ्चालनमा ल्याउने प्रतिबद्धता व्यक्त गरेको छ ।
माडीका नगरप्रमुख ताराकुमारी काजी महतोले निर्माणपक्ष सपना, लोहनी एण्ड ब्रदर्श ज्वाइन्ट भेन्चरका प्रमुख अनिल लोहनीलाई निर्माणस्थलमै बोलाई गर्नुभएको कुराकानीमा लोहनीले सो प्रतिबद्धता गर्नुभएको हो ।
विभिन्न कारणले पुल निर्माणमा ढिलाई हुनगएपनि अब कामदारको संख्या थप गरी निर्माण कार्यलाई तीब्रता दिने लोहनीको भनाई थियो ।
पुल निर्माण कार्यका लागि आवश्यक सहयोग र सहजिकरणमा निरन्तर काम गरेको भन्दै माडीका नगरप्रमुख महतोले जेष्ठ महिनाभित्रै काम पुरा हुने विश्वास व्यक्त गर्नुभयो ।
हाल पुल निर्माणस्थलमा न्युन संख्यामा कामदार खटिएका छन् । पुलको साइड फिलिङ लगायत फिनिसिङका कामहरु गरी करीब १५ प्रतिशत काम बाँकी रहेको छ ।
मगुही पुल निर्माण अघि बढेसंगै माडीका अन्य अधुरा पुलहरुको निर्माण पनि अगाडि बढाउने निर्माण पक्षको भनाई छ ।
