चितवन । माडीको कान्तिपुर गाउँमा राजाराम/डेमा तिमिल्सिना दम्पत्तीले सुरुवात गरेको ‘ड्रागन फ्रुट’को व्यवसायिक खेतीले मनग्य आम्दानीसंगै चर्चा कमाउन थालेको छ ।
करीब ५ बर्षअघि चक्लाबन्दीमा आधारित सामुहिक खेती परियोजना अन्तरगत परीक्षणका रुपमा तिमिल्सिना दम्पत्तीले आफ्नो घरसंगै ‘ड्रागन फ्रुट’ खेती सुरु गरेको थियो ।
उत्पादन सुरु भएसंगै माडीसहित भरतपुर र काठमाडौंसम्म उच्च मागसहित ‘ड्रागन फ्रुट’ बिक्री हुन थालेसंगै तिमिल्सिना दम्पत्तीले स-परिवार ’एग्री नेपाल ड्रागन फ्रुट फर्म तथा रिसर्च सेन्टर’को नाउँबाट व्यवसायिक फर्म स्थापना गरी हाल खेतीको क्षेत्रफल समेत बिस्तार गरेको छ ।
औषधीय गुण हुने यो फलको खेतीका लागि माडीको हावापानी अति उत्तम रहेको तथा अन्य क्षेत्रको भन्दा माडीको ड्रागन फ्रुट राम्रो र स्वादिलो मानिएकोले माग बढेको कृषक राजाराम तिमिल्सिनाले जानकारी दिनुभयो ।
यतिखेर राताम्मे भएर फलेको सो फ्रुटबारी हेर्न टाढा-टाढाका मानिस आउने गरेका छन् । उनीहरुले ड्रागन फ्रुट किन्नुका साथै ड्रागन फ्रुटको बिरुवा समेत किनेर लैजाने गरेका छन् ।
