माडी, चितवन । दशैं पर्वको अवसर पारी माडीको राधापुरस्थित खेल चौरमा प्रथम दियो कप माडी नगरस्तरीय फुटबल प्रतियोगिता-२०८१ सुरु भएको छ ।
माडी क्षेत्रमा खेलकूद, सामाजिक सेवा एवं जनजागरणमा उल्लेख्य योगदान र तीन दशक लामो इतिहास रहेको दियो क्लब माडी, मा.न.पा.-५, चितवनको आयोजनामा मंगलबारदेखि सो प्रतियोगिता सञ्चालन सुरु भएको हो ।
प्रतियोगिताको उद्घाटन खेलमा बुद्धज्योति युवा क्लबलाई ट्राइब्रेकरमा पराजित गर्दै बसन्तपुर युनाइटेड क्लब विजयी भएको छ । खेलको निर्धारित समयावधीमा दुबै टिमबाट १-१ गोलको बराबरी भएपछि पेनाल्टी सुटआउटमा ५-४ गोलअन्तरबाट बसन्तपुर युनाइटेड अगाडि बढेको हो ।
बागमती प्रदेशसभा सांसद एवं प्रदेशसभाको शिक्षा, स्वास्थ तथा कृषि समितिका सभापति ठाकुर प्रसाद ढकालले एक औपचारिक कार्यक्रमबिच मंगलबार प्रतियोगिताको समुद्घाटन गर्नुभएको हो । खेलको दोस्रो दिन भोलि वुधबार बैकुण्ठधाम युवा क्लब र आयोजक दियो क्लब ’बि’ टिमबिच प्रतिस्पर्धा हुने खेल तालिका रहेको छ ।
