माडी, चितवन । दुई साताअघि चोरी भई हराइरहेको एक मोबाइल, ईलाका प्रहरी कार्यालय माडी र स्वदेशकर्मी एक महिला पत्रकारको संयुक्त स्टींग अपरेशनबाट भेटिएको छ ।
कार्तिक १६ गते राती ब्रह्मपुरी निवासी एक स्वदेशकर्मी कर्मचारीको घरबाट हुवावेइ ब्राण्डको मोबाइल चोरी भएको थियो । मोबाइलको विवरणसहित कार्तिक १७ गते माडी प्रहरीमा आवेदन गरिएसंगै विभिन्न उपाय लगाई चोर पक्रने प्रयास भएपनि सफल हुन सकिरहेको थिएन ।
यस्तैमा, चोरिएको मोबाइलमा चालू रहेको सिमकार्ड (नम्बर)मा एक महिला पत्रकारले बारम्बार फोन गरी सुरुमा साथीको साइनो गाँसी पछि प्रेमिल कुराकानी गर्दै भेटघाटका लागि बोलाएसंगै डेटिङका लागि बसन्तपुर बजार आइपुगेको चोर पक्राउ परेको हो ।
डेटिङ स्थलमा सादा पोशाकमा पहिलेनै खटिएको प्रहरीले चोरिएको मोबाइल सहित माडी-५, माथिल्लो ब्रह्मपुरी निवासी १८ बर्षका देव बहादुर गुरुङलाई कार्तिक २९ गते राती नियन्त्रणमा लिएको थियो । निजलाई आवश्यक कानुनी कारवाही पुरा गरी बुबाआमाको रहोबरमा छाडिएको स्टीङ अपरेशनमा संलग्न महिला पत्रकारले बताइन ।
