माडी, चितवन । गैरआवासीय नेपाली संघ अन्तर्राष्ट्रिय समन्वय परिषद (एनआरएनए आइसीसी)का महासचिव बुद्धिसागर सुवेदीले माडीको बसन्तपुरमा ६ तले व्यवसायिक कम्प्लेक्स (भवन) निर्माण अगाडि बढाउनुभएको छ ।
माडी-५, ब्रह्मपुरीका स्थायीबासी रहँदै हाल संयुक्त राज्य अमेरिकामा बस्नुहुने शैक्षिक एवं व्यवसायिक पृष्ठभूमिका सुवेदीले बसन्तपुर बजारस्थित शहीद चोकमा सो व्यवसायिक भवन निर्माण अगाडि बढाउनुभएको हो । हालसम्म ३ तलाको ढलान कार्य सकिएको र त्यसमाथिको निर्माण कार्य जारी रहेको एनआरएनए अमेरिकाका पूर्व अध्यक्ष समेत रहनुभएका सुवेदीले बताउनुभयो ।
सो मल्टिकम्प्लेक्स भवनमा बिगमार्ट वा सेल्सबेरी मोडेलका ठूला मार्ट, नारायणगढस्थित बैष्णव होटल र केहि कमर्सियल बैंकहरुले शाखा स्थापनाको रुचि देखाएको उहाँले जानकारी दिनुभयो । भवन परिसरमा पहिलो चरणमै मल्टिप्लेक्स सिनेमा घर समेत स्थापना हुने र दोश्रो चरणमा स्वीमिङ पुल सहित विकेण्ड किड्स प्ले ग्राउण्ड बनाइने उहाँले जानकारी दिनुभयो ।
माडी क्षेत्रमा ३०० देखि ४०० जनासम्मले रोजगारी पाउने ठूलो व्यवसाय सुरु गर्न आफूले पहल गरिरहेको उहाँको भनाई छ । यसका लागि विश्वभर छरिएर रहेका लगानीकर्ताहरुसंग आफू सम्पर्कमा रहेको बताउँदै आवश्यक सहजिकरण गरिदिन माडी नगरपालिका एवं यहाँका सरोकारवालाहरुसंग उहाँले अनुरोध गर्नुभयो ।
