माडीकाे भाडा बढेसंगै चितवनका अन्य रुटमा अनधिकृत भाडा बढेको गुनासो

नारायणगढ माडी ठोरी हुलाकी सडक खण्डमा सञ्चालित सार्वजनिक बसहरुले यात्रु भाडा बढाएसंगै चितवनका अन्य रुटमा पनि बिना अनुमती सवारी भाडा बढेको गुनासो उठेको छ ।

माडीको बाटो बिग्रिएको र पुलहरु भत्केको देखाउँदै यातायात व्यवसायीहरुले माडी नगरपालिकाको सिफारिससहित प्रमुख जिल्ला अधिकारी नेतृत्वको सवारी भाडा निर्धारण समितिमार्फत निर्णय गराई भाडा बढाएका थिए । तर सवारी भाडा बढाउन यातायात व्यवस्था सेवा कार्यालय, भरतपुरले माडी ठोरी रुटको मात्रै मात्रै भाडा बढेको जनाएपनि व्यवसायीहरुले अन्य रुटमा पनि साबिकभन्दा धेरै भाडा असुलिरहेको गुनासो आइरहेको हो । जथाभावी भाडा असुलिएको गुनासो बढेपछि आज चितवन जिल्ला प्रशासन कार्यालयले त्यस्ता सवारीलाई कारवाही गर्न ट्राफिक प्रहरीलाई निर्देशन दिएको छ । बिना आधार चर्को भाडा असुल्ने बस, म्याजिक, मिनिबस लगायत कुनैपनि सवारी साधनबारे तत्काल प्रहरीलाई खबर गर्न जिल्ला प्रशासन कार्यालयले सार्वजनिक अनुरोध गरेको हो ।

यता, नारायणगढ माडी ठोरी रुटमा भने समायोजित भाडादर पूर्ण कार्यान्वयनमा आएको छ । प्रतिकिलोमिटर रु २ रुपैंया ४५ पैसाको दररेट अनुसार भरतपुरदेखि बनकट्टाको रु ८५, गर्दी÷सेरुवाको रु ९०, बरुवाको ९८ र चिरौली÷सिधुवाको रु १०५, बसन्तपुरको रु ११०, कल्याणपुरको रु १२०, कीर्तनपुरको रु १२३, देबेन्द्रपुरको रु १३०, खरकट्टाको रु १३६ र टम्टा÷कृष्णनगरको रु १४० तथा बगहीको रु १५० पुगेको छ । सम्पूर्ण प्रक्रिया पुरा गरी माडीको भाडा बढाइएको भएपनि एक्कैचोटी भारी भाडा बृद्धि भएको माडीमा पनि गुनासो आइरहेको छ ।