रीउ नदीको पुलदेखि घाँघर खोलासम्म कालोपत्रे बाटो बनाउने ठेक्का पाएको आशिष निर्माण सेवाले निर्धारित समयमा काम पुरा गर्न नसकिने जनाएको छ । आशिष निर्माण सेवाले कालोपत्रे गर्न आवश्यक गिट्टी, बालुवा, कंक्रिट, चिप्स लगायतका सामानको अभाव देखाउँदै निर्धारित समयमा काम पुरा गर्न नसक्ने जनाएको हो । सडकमा सब ग्रेड, ग्राभेल (सब वेश) र कालोपत्रेको सम्पूर्ण काम बाँकी रहेको छ । स्वदेश एफ.एम.को दैनिक बहसमुलक कार्यक्रम आजको सन्दर्भमा कुराकानी गर्दै आशिष निर्माण सेवा अन्तरगतको भरतपुर माडी ठोरी हुलाकी बाटोका कन्ट्रयाक्ट म्यानेजर रोहित भट्टराईले हाल माडीको सडकको स्ट्रक्चरका कामहरु पुरा भएको जनाउनुभयो ।
स्ट्रक्चरका कामहरु अन्तरगत नाला कल्भर्ट, टेवा पर्खाल, ह्युमपाइप र ढुंगाको ग्याबिन जाली निर्माण गरिएको हो । करीब ७ मिटर चौडाई रहने कालोपत्रे बाटोको दुबै छेउमा नाला सहित १० मिटर चौडाई कायम रहने र नालाको निर्माण कार्य सकिएको भट्टराईको भनाई छ । २०७३ साल माघमा सर्भे गरी काम सुरु गरेको आशिष निर्माण सेवाले गतबर्षको बैशाखबाट निर्माणकार्य सुरु गरेको हो । ठेक्काको म्याद आउँदो माघ ९ गतेसम्म रहेपनि सो मितिमा काम नसकिने स्पष्ट पार्दै कम्पनीले ठेक्काको म्याद थप गर्न सडक विभागलाई आवेदन गर्ने जनाएको छ ।
कंक्रिट लगायतका निर्माण सामग्री उपलब्ध गराउन अस्थायी क्रसर प्लाण्ट राख्न खोजेको भएपनि नपाएको कन्ट्रयाक्ट म्यानेजर भट्टराईले जनाउनुभयो । माडी नगरपालिकाले आफ्नै क्रसर मेसिन राख्नका लागि टेण्डर गर्न लागेकोले नगरपालिकाको क्रसर प्लाण्टबाट कंक्रिट, गिट्टी, बालुवा लगायतका निर्माण सामग्री खरिद गरी काम गर्ने उहाँको भनाई थियो । नगरपालिकाले क्रसरमार्फत निर्माण सामग्री उपलब्ध गराएको छ महिनाभित्र काम पुरा हुने कम्पनीले जनाएको छ ।
