जंगली हात्तीको आक्रमणमा परी मृत्यु भएका माडी टम्टामा दुईजना महिलाको परिवारलाई मंगलबार माडी नगरपालिकाको टोलीले भेट गरी समवेदना प्रकट गरेको छ । माडी नगरपालिकाको वडा नं. ९ कार्यालयको आयोजनामा सम्पन्न सो कार्यक्रममा माडी नगरपालिकाका जनप्रतिनिधी र कर्मचारीहरुसंगै चितवन क्षेत्र नं. २ ख का प्रदेश साँसद घनश्याम दाहाल अविनाश प्रमुख अतिथिका रुपमा उपस्थिति रहनुभएको थियो । वडा नं. ९ का वडाध्यक्ष शिवहरि सुवेदीको अध्यक्षतामा सम्पन्न सो कार्यक्रममा नगर प्रमुख ठाकुर प्रसाद ढकाल, उपप्रमुख ताराकुमारी काजी महतो, वडा नं. ३, ५, ६ र ८ का वडाध्यक्षहरु क्रमशः पुरन महतो, रामबन्धु पोखरेल, भरत बहादुर गुरुङ र कृष्णराज अधिकारीसंगै नेपाल कम्युनिष्ट पार्टी (नेकपा)का माडी नगरस्तरीय नेताकार्यकर्ताहरुको समेत सहभागिता रहेको थियो । भेटघाटका सहभागीहरुले हात्तीबाट सुरक्षाका लागि कंक्रिट पर्खाल निर्माणका लागि माडी नगरपालिकासंगै संघीय र प्रदेश सरकारसंग विशेष कार्यक्रम सञ्चालन हुनुपर्नेमा जोड दिएका थिए ।
यसैबिच, माडी भरतपुर सम्पर्क मञ्चले समेत मृतकद्वयको परिवारलाई भेटघाट गरी समवेदना व्यक्त गरेको छ । सम्पर्क मञ्चका अध्यक्ष जीतेन्द्र भण्डारी र सचिव हिमाल दवाडी लगायतको टोलीले मृतकद्वयको परिवारलाई भेटघाट गरी मृतकद्वयप्रति श्रद्धाञ्जली तथा परिवारजनमा समवेदना व्यक्त गरेको हो । गत मंसिर १२ गते दिउँसो करीब ३ बजे माडी नगरपालिका वडा नं. ९, टम्टा निवासी बर्ष ३५ की शुसिला भण्डारी र सोही वडा निवासी बर्ष ६० की कृष्णकली पौडेलको हात्तीको आक्रमणमा परी मृत्यु भएको थियो ।
