कुसुमखोलाबाट बसाई सरी आएका चेपाङ परिवारहरुलाई सुरक्षित घरमा राख्न माडी नगरपालिकाले पूर्वी माडीको राइडाँडामा घर निर्माण कार्यलाई तीब्रता दिएको छ ।
माडी नगरपालिका वडा नं. ९ स्थित सो टोलमा रहेका ४० घरपरिवार चेपाङहरुलाई खरले छाएका अस्थायी र कच्ची छाप्रोहरुबाट जस्तापाताले छाएका सुरक्षित घरमा राख्न नगरपालिकाले घर निर्माण गरिरहेको हो । छिमेक लघुवित्त वित्तीय संस्था र प्रदेश नं. ३ सरकारको सहयोगमा जनता आवास कार्यक्रम अन्तरगत नगरपालिकाले प्रत्येक परिवारलाई दुईवटा कोठायुक्त घर बनाई हस्तान्तरण गर्ने योजना रहेको छ ।
कोरोना भाइरसको नियन्त्रणका लागि लागु रहेको लकडाउनका कारण अन्य सबैजसो विकासे कामहरु बन्द रहेपनि घर निर्माण कार्य रोकिनु परेको छैन । हाल १४ वटा घर तयार हुने क्रममा रहेको र आउँदो बर्षायाम अगावै ४० वटै घर निर्माण पुरा हुने माडी नगरपालिकाका प्रवक्ता एवं वडा नं. ९ का वडाध्यक्ष शिवहरि सुवेदीले जनाउनुभयो । त्यसपश्चात अन्य ठाउँमा बसिरहेका थप चेपाङ परिवारका लागि घर बनाउने परियोजना सुरु हुने उहाँको भनाई छ ।