लेखापाल पदमा नयाँ नियुक्ति लिई आउनुभएका विश्वज्योति कोइरालालाई सोही कार्यक्रमबाटै स्वागत
माडी नगरपालिकामा जनस्वास्थ्य प्रमुख जीवन कुमार श्रेष्ठको अनिवार्य अवकास भएसंगै एक औपचारिक कार्यक्रमबिच उहाँलाई बिदाई गरिएको छ । त्यसैगरी लेखापाल पदमा नयाँ नियुक्ति लिई आउनुभएका विश्वज्योति कोइरालालाई सोही कार्यक्रमबाटै स्वागत गरिएको छ ।
करीब ७ महिनाअघि, २०७६ असोज १ गते माडी नगरपालिकामा जनस्वास्थ्य अधिकृत, अधिकृत सातौं तहबाट सेवा सुरु गर्नुभएका जीवन कुमार श्रेष्ठले करीब ३६ बर्ष ५ महिना सरकारी सेवामा बिताउनुभयो । स्थायी घर भरतपुरमा रहेका उहाँ माडी आउनुअघि भरतपुर महानगरपालिकाको स्वास्थ्य संयोजकको जिम्मेवारीमा रहनुभएको थियो । श्रेष्ठको कार्यकालमा माडीको बघौंडा अस्पतालमा शल्यक्रिया सेवा सुरुवात, ब्लड प्वाइन्ट स्थापना, खोप अभियान र विभिन्न स्वास्थ्य संस्थाहरुको स्तरिकरण भएको छ । सेवाको अन्तिम दिनहरुमा उहाँ कोरोना भाइरसको संक्रमण नियन्त्रणको काममा निरन्तर खट्नुभएको थियो ।
त्यस्तै स्थानीय सेवा आयोगबाट सहायक पाँचौ तह लेखापालमा नयाँ नियुक्ति लिएर पहिलो हाजिरी हुन माडी आउनुभएका विश्वज्योति कोइराला चितवनकै गीतानगर निवासी हुनुहुन्छ । यसअघि माडी नगरपालिकाको लेखा अधिकृतको जिम्मेवारीमा रहनुभएकी करुणा रिसालको मकवानपुरस्थित भिमफेंदी गाउँपालिकामा सरुवा भएसंगै सो पदमा कोइरालाको पदस्थापन भएको हो ।
