बैदिक धर्म परिषद् क्षेत्रीय कार्यसमिति माडीको बैठकले कोरोना कहरको सन्दर्भमा पितृपक्ष सोह्र श्राद्धमा गरिने अनुष्ठानलाई सहजिकरण गर्ने निर्णय गरेको छ ।
बैठकले (भोलि) भदौ १७ गतेबाट सुरुवात हुन लागेको पितृपक्ष सोह्र श्राद्धमा जजमानलाई आफ्नो घर परिवार बाहेक अरु कसैलाई नबोलाउन आग्रह गर्ने निर्णय गरेको हो । त्यसैगरी पूजा बिधी र अनुष्ठानका क्रममा स्यानिटाइजर र मास्कको अनिवार्य प्रयोग गर्ने, टिका लगाउँदा हातको प्रयोग नगरी सुरक्षित बिधी अपनाउने, सामुहिक श्राद्ध नगराउने र कोरोना संक्रमण रोकथामका लागि सरकारले लागु गरेका अन्य नियमहरुको पालना गर्ने निर्णय गरेको हो ।
बैदिक धर्म परिषद् माडीका अध्यक्ष तथा केन्द्रीय सदस्य लक्ष्मी प्रसाद पराजुलीको अध्यक्षतामा सम्पन्न बैठकमा माडीका केहि पण्डितहरु सशरीर तथा केहि अनलाइन तथा फोनका माध्यमबाट सहभागी रहेका थिए । सोह्र श्राद्धमा पितृहरुको उद्दारका लागि घरघर र तिर्थस्थलमा श्राद्धकर्म गरि पितृहरुको सम्झना गरिन्छ । प्रतिपदा तिथी देखि दशैं शुरु हुने जमरे औंसीसम्मको १५ दिन दिवंगत आफन्तको पुण्यतिथीमा चोखोनितो गरी महालय श्राद्ध गरि तर्पण र पिण्ड दान दिने प्रचलन छ ।
