नियमित कक्षाहरु बन्द रहँदा बैंकल्पिक सिकाईलाई प्रभावकारी बनाउन माडीका सबै लिडर विद्यालयहरुमा कल सेन्टर स्थापना गरिएको छ ।
कोरोना भाइरस संक्रमण फैलिन नदिन शैक्षिक संस्थाहरु बन्द रहेको अवस्थामा विद्यालय र विद्यार्थीबिच सम्पर्क तथा सिकाई प्रक्रिया सहजिकरणका लागि माडीका लिडर विद्यालयहरुमा कल सेन्टर स्थापना भएको हो । माडीका सोमेश्वर मा.वि. बरुवा र माडी मा.वि. बसन्तपुरमा २/२ वटा तथा जनकल्याण मा.वि. कल्याणपुर, कृष्णनगर मा.वि. कृष्णनगर, जनजीवन मा.वि. खरकट्टा, खैरहनी मा.वि. खैरहनी र आधारभूत विद्यालय बाँदरझुलामा १/१ वटा कल सेन्टरहरु स्थापना भएका हुन् । कल सेन्टर शनिवारसहित हरेक दिन बिहान ६ बजेदेखि साँझको ६ बजेसम्म सञ्चालनमा रहने व्यवस्था गरिएको छ ।
लिडर विद्यालयले स्वाध्ययन वा रेडियो पाठशालामार्फत अध्ययन गरिरहेका फिडर विद्यालयका विद्यार्थी समेतलाई टेलिफोनका माध्यमबाट सिकाई प्रक्रियामा सघाउने कार्यदेश पाएको माडी नगरपालिका शिक्षा शाखाका प्रमुख उपसचिव पुष्प ढकालले जनाउनुभयो । आज (असोज १ गते)देखि रेडियो पाठशालाको क्रेडिट गणना समेत सुरु भएको भन्दै उहाँले जिम्मेवारीपूर्वक पठनपाठन गर्न सबै विद्यार्थी र शिक्षकहरुमा आग्रह गर्नुभयो । कल सेन्टरमा शिक्षक ड्युटीमा रहने र विद्यार्थीहरुले फोनमार्फत सिकाइ सहयोग पाउन सक्ने व्यवस्था गरिएको हो ।
