कल्याणपुर महिला साना किसान कृषि सहकारी संस्थाको अध्यक्षमा यकुमाया चापागाईं निर्वाचित हुनुभएको छ ।
सहकारीको सातौं साधारणसभा तथा दोश्रो अधिवेशनबाट, अध्यक्ष पदका अर्का प्रत्यासी कमलमाया सुवेदी गौतमलाई पराजित गर्दै चापागाईं अध्यक्षमा निर्वाचित हुनुभएको हो । सहकारीको उपाध्यक्षमा भने तुलसी निरौला चयन हुनुभएको छ ।सहकारीका सदस्यहरुमा सोहदरी पावे, पार्वती पोखरेल, सीता पौडेल, कमलमाया सुवेदी गौतम, तुलसी न्यौपाने, लीला सुनार र देवका पण्डित पाण्डे चयन हुनुभएको छ । त्यस्तै लेखा समिति संयोजकमा जया निरौला निर्वाचित हुनुभएको भने लेखा सदस्यद्वयमा निशा काफ्ले पौडेल र टिका कुमारी ओझा चयन हुनुभएको छ ।
मीना अधिकारीको अध्यक्षतामा सम्पन्न साधारणसभाको प्रमुख अतिथि माडी नगरपालिकाकी उपप्रमुख ताराकुमारी काजी महतो रहनुभएको थियो । सहकारीले गत आर्थिक बर्ष २०७६/७७ मा ३१ लाख ७३ हजार खुद मुनाफा आर्जन गरेको सहकारीकी व्यवस्थापक लीलादेवी क्षेत्रीले जानकारी दिनुभयो ।
