माडी, चितवन । माडीमा मल्टिप्लेक्स सिनेमा हल सहितको ६ तले व्यवसायिक कम्प्लेक्स भवन निर्माण गरिरहनुभएका बुद्धिसागर सुवेदीले सो भवन निर्माणका क्रममा माडी नगरपालिकाका इञ्जिनियरहरुबाट दुःख पाएको गुनासो गर्नुभएको छ ।
स्वदेश एफ.एम.ले सुरुवात गरेको विक्ली पडकास्ट कार्यक्रमको सुरुवाती अंकमा बोल्दै माडी-५, ब्रह्मपुरी निवासी सुवेदीले भवन निर्माणका क्रममा जग (फाउण्डेशन)को हात्तीपाइले हालिसकेपछि भत्काउन लगाइएको गुनासो गर्नुभएको हो ।
गैरआवासीय नेपाली संघ अन्तर्राष्ट्रिय समन्वय परिषदका महासचिव एवं एन.आर.एन.ए. अमेरिकाका पूर्व अध्यक्ष समेत रहनुभएका सुवेदीले पडकास्टमा बोल्दै माडी नगरपालिकाका इञ्जिनियरहरुले सहयोग गर्नुको सट्टा दुःख दिएकोले यसबारे मेयर, उपमेयर र नगर कार्यपालिकाले सत्यतथ्य जाँचबुझ गर्न अनुरोध गर्नुभयो । ठूला लगानीकर्ता भित्र्याएर सयौंको संख्यामा रोजगारी सिर्जना गर्नसके मात्रै माडीको आर्थिक विकास हुने भएकाले त्यस्तो वातावरण बनाउन नगरपालिका लाग्नुपर्ने उहाँको सुझाव छ ।
