भ्रष्टाचार विरोधी अभियन्ता ज्ञानेन्द्र शाहीले आफूमाथि भएको कुटपीट घटनाको मुख्य योजनाकारका रुपमा माडीका युवा नेता सन्तोष पनेरुलाई आरोपित गरेका छन् ।
शाहीले केहि युट्युब च्यानलहरुलाई अन्तरवार्ता दिँदै गत महिना भरतपुरको ग्लोबल होटलमा भएको हमलाको मुख्य योजनाकारका रुपमा पनेरुलाई आरोपित गरेका हुन् । विगतमा माओवादी केन्द्र निकट युवा संगठन वाई.सि.एल. नेपालका केन्द्रीय सदस्य रहेका पनेरु हाल नेकपा सम्बद्ध युवाहरुको संगठनको केन्द्रीय सदस्य रहेका छन् । पार्टीभित्र उनी भरतपुर महानगरपालिकाकी नगरप्रमुख रेणु दाहाल र प्रचण्ड पक्षीय मानिन्छन् ।
यसअघि, शाहीमाथिको आक्रमणको आरोपमा चितवन प्रहरीले एक जनालाई पक्राउ गरेको थियो । जिल्ला प्रहरी कार्यालय चितवनका अनुसार सो अभियोगमा भरतपुर महानगरपालिका ११ निवासी ३२ वर्षीय अविरल पोख्रेल पक्राउ परेका हुन् । तर शाही स्वयम्ले भने पोख्रेल मुख्य दोषी नभई पनेरु दोषी रहेको तर उनी निस्फिक्री देशका विभिन्न पर्यटकीय केन्द्रहरु घुम्दै हिँडिरहेको आरोप लगाएका छन् ।
चितवन प्रहरीलाई हाल पनेरुलाई पक्राउ गर्नुपर्ने दबाब रहेको छ । गत असोज ११ गते भरतपुरस्थित चौबिसकोठीमा नेपालका लागि नेपालीले आयोजना गरेको कार्यक्रम शुरू हुनै लाग्दा शाहीमाथि आक्रमण भएको थियो । कार्यक्रम स्थगन भएपछि ग्लोबल होटलबाट बा.३ ख. ८४५८ नम्बरको माइक्रो बसमा फर्कने क्रममा होटल परिसरमा नै शाहीमाथि आक्रमण भएको थियो ।