माडीको हुलाकी बाटोमा कालोपत्रे गर्ने जिम्मेवारी पाएको निर्माण कम्पनी आशिष निर्माण सेवाले नै पूर्वी नेपालको विराटनगरमा बनाएको कालोपत्रे बाटोमा टिपर भासिएको छ ।
गत सोमबार साँझ विराटनगर-१० को पिपल चोकमा कालोपत्रे सडकमा रोकेर राखेको टिपर भासिएको हो । सो सडक क्षेत्रीय सहरी विकास परियोजनाको सहयोगमा चितवनको आशिष निर्माण सेवाले कालोपत्रे गरेको हो । सडक निर्माण गर्दा प्राविधिक त्रुटी भएका कारण सडक भासिएको क्षेत्रीय सहरी विकास परियोजना विराटनगरको भनाई छ । सो सडकको बीचमा ढलको पाइप बिछ्याइएको छ ।
सडक निर्माणका क्रममा भएको त्रुटी सच्याउन परियोजनाले ठेकेदार पक्षलाई निर्देशन दिएको छ । आशिष निर्माण सेवाले ठेक्का पाएको माडीको हुलाकी बाटोको कालोपत्रे परियोजनामा दुई पटकसम्म म्याद थप भई अन्तिम समयमा काम अगाडि बढेको थियो । तर कहिले क्रसर प्लान्ट राख्ने त कहिले लकडाउनका कारण प्राविधिकहरु नजुटेको भन्दै काम अलपत्र रहँदै आएको छ ।
