माडी चितवन – माडी नगरपालिका वडा नं. १ मा अवस्थित ऐतिहासिक, धार्मिक तथा पर्यटकीय स्थल गोद्धक धाममा रामनवमीको अवसर पारी यसबर्ष पनि भव्य मेला आयोजना भएको छ । परम्परादेखि सञ्चालन हुँदै आएको यो धार्मिक मेला यसबर्ष चैत्र २२ देखि २६ गतेसम्म लाग्ने गोद्धक धाम व्यवस्थापन समितिका अध्यक्ष तुल्सिङ गुरुङले बताउनुभयो ।
मेला अन्तरगत यसबर्ष वडास्तरीय लोकदोहोरी प्रतियोगिता तथा महिला तथा पुरुष भेट्रान भलिबल एवं अन्य खेलकुद प्रतियोगिता समेत आयोजना गरिने गुरुङले जनाउनुभयो ।
त्यस्तै, स्थानीय कलाकारहरूको सांगीतिक प्रस्तुति, झाँकी तथा अन्य मनोरञ्जनात्मक कार्यक्रमहरूले मेलालाई थप आकर्षक बनाउने अपेक्षा गरिएको छ । यसबाहेक परम्परागत परशुराम कुण्ड स्नान, कुकुरनाथ बिरालनाथको दर्शन लगायतका आकर्षण समेत सो मेलासंग जोडिएका छन् ।
गोद्धक धाम धार्मिक तथा पौराणिक रूपमा महत्वपूर्ण स्थल भएकाले यहाँ प्रत्येक वर्ष हजारौं भक्तजन तथा पर्यटकहरूको आगमन हुने गर्दछ । गोद्धक क्षेत्र समेटिएको माडी १ वडाका वडाध्यक्ष अमित कुमार लामाले मेलाको तयारी अन्तिम चरणमा पुगेको जनाउँदै भक्तजनहरूलाई मेलामा सहभागिताका निम्ति आग्रह समेत गर्नुभयो ।
