माडी चितवन – सामान्यतः घरको पर्खाल निर्माणमा इँटा, ढुंगा वा ब्लकको प्रयोग हुनेगर्छ तर माडीका एक होटल व्यवसायीले भने बोत्तल (खाली सिसा)को प्रयोग गरी नौलो किसिमको घर निर्माण गरिरहनुभएको छ ।
माडी नगरपालिका वडा नं. २, लौंगाईंमा चौधरी होमस्टेको नाउँबाट थारु परिकार सहितको होटल र घरवार (होमस्टे) सञ्चालन गर्दै आउनुभएका अनित कुमार महतोले सो नविन प्रकारको घर निर्माण गरिरहनुभएको हो ।
निर्माणाधीन घर हेर्न दिनहुँ मानिसहरूको भिड लाग्न थालेको छ । निर्माण सकिएपछि ‘रेष्ट्रो एण्ड बार’का निम्ति प्रयोग हुने गोलाकार डिजाइनको सो घरको वाल (भित्ता)मा बियरका बोत्तल प्रयोग गरेर आर्कषक डिजाइन निर्माण भइरहेको देखिन्छ ।
बोत्तल हाउस निर्माणका लागि आफैसंग भएका करीब १ हजार थान र प्रतिगोटा ३ रुपैंयाको दरले थप ६ हजार थान बोत्तल प्रयोग गरेको महतोले बताउनुभयो । बोत्तलको प्रयोगबाट ईंटाको तुलनामा निर्माण खर्च केहि कम लागेको साथै फोहोर व्यवस्थापनमा सहजता एवं वातावरण मैत्री र आकर्षक समेत भएको उहाँको अनुभव छ । आउँदो बैशाख अन्त्यसम्म शिसा बार सञ्चालनमा आइसक्ने महतोले जनाउनुभयो ।
