माडी नगरमा विध्युत आपूर्ति अनियमित हुँदै, दिनहुँजसो बिनासूचना घण्टौंसम्म बिजुली अवरुद्ध

माडी, चितवन । चितवनको माडी नगरपालिकामा पछिल्लो समय विध्युत आपूर्ति अत्यन्तै अनियमित हुँदै गएको छ । दिनहुँजसो बिनासूचना घण्टौंसम्म बिजुली अवरुद्ध हुँदासर्वसाधारणदेखि व्यवसायीहरूसम्म समस्यामा परेका छन् ।

स्थानीयवासीका अनुसार केही दिन यता विध्युत कहिले आउने, कहिले अवरूद्ध हुने स्पष्ट समयसमेत थाहा नपाइने अवस्थाले जनजीवन प्रभावित भएको हो । बिजुली नहुँदा घरायसी प्रयोगकर्तासंगै साना उद्योग–व्यवसायी, सिंचाई मोटर चलाउनुपर्ने कृषक र अन्य सबैजसो बिजुली उपभोक्ताहरुले समस्या भोग्नु परिरहेको छ ।

शनिवार समेत दिनभरी बिजुली अवरुद्ध रह्यो । बिजुली अवरुद्ध हुनुका कारणबारे नेपाल विध्युत प्राधिकरणको माडी प्रशाखाकै कर्मचारीहरु अनभिज्ञ रहेको बताए । असार महिनाभरी नै अवस्था यस्तै यस्तै रहँदै आएको छ । स्थानीयवासी र उपभोक्ताहरूले यथाशीघ्र नियमित आपूर्ति सुनिश्चित गर्न माग गर्दै सरोकारवालालाई दबाब दिन थालेका छन् ।