चितवन राष्ट्रिय निकुञ्जबाट निस्किएको जंगली बाघले बिहीबार साँझ ५ः३० बजे पूर्वी माडीको खरकट्टा क्षेत्रमा एकवटा गाईलाई आक्रमण गरी गम्भीर घाइते बनाएको छ । नारायणगढ माडी ठोरी हुलाकी सडकबाट केवल १०० मिटर भित्रपट्टी रहेको चरन क्षेत्रमा बाघले अमर बहादुर प्रजाको दुहुनो गाईलाई आक्रमण गरी घाइते बनाएको हो । बाघले गाईको दाहिने खुट्टा र टाउकोमा आक्रमण गरेको हो ।बगरमा चरिरहेको गाईलाई अचानक बाघले आक्रमण गरेपछि गोठालो गएका कालु प्रजा लगायतका युवाहरुले होहल्ला गर्दै बाघ धपाएका थिए । गाई गोठालाहरुले धपाएको बाघ घटनास्थल नजिकै काँसघारी क्षेत्रमा पसेको देखिएको हाम्रा पूर्वी माडी सहकर्मी भुपेन्द्र गीरिले जानकारी दिनुभयो । बाघ अझैपनि सोही क्षेत्रमा रहेको आशंका गरिएकाले त्यसले थप क्षती पुर्याउन सक्ने खतरा रहेको छ ।
यसैबिच, जंगली जनावर धपाउन गाउँ गस्तीमा रहेको माडी धोबाहाको एक टोलीका प्रतिनिधी घाइते भएका छन् । जनावर धपाउने गस्तीमा रहेको क ग्रुपका सदस्य बर्ष २७ का धनेश्वर महतो घाइते हुनुभएको हो । मृगहरुको समूह उफ्रँदै आउँदा भुइँमा पल्टिन पुगेका उहाँको नाकमा चोट लागेको छ । उहाँको नाकको हाड भाँचिएको स्थानीयबासी जितेन्द्र मर्दनीयाले जानकारी दिनुभयो ।
