चितवन समाज इजरायलको विशेष पहलमा माडी जगन्नाथपुरीका मृगौला पीडित सुरेस वहादुर गुरुङ्गको लागि संकलन भएको सहयोग रकम भोलि अाइतबार एक कार्यक्रमका बिच पीडित परिवारलाई हस्तान्तरण गरिने भएको छ । चितवन युवा समुह अन्तर्राष्ट्रिय समन्वय समिति, नेपालको आयोजनामा सो सहयोग रकम हस्तान्तरण गरिन लागेको चितवन समाज इजरायलकी अध्यक्ष सरिश्मा बरालले स्वदेश एफ.एम.लाई जानकारी दिनुभयो । पीडित परिवारलाई विभिन्न देशमा संकलिन रकम एकमुष्ठ रु ५ लाख ५५ हजार ७ रुपैंया माडी नगरपालिका कार्यालयमा बिहान १० बजेपछि हस्तान्तरण हुने जनाइएको छ ।
दुई बर्ष अघिदेखि दुईवटै मृगौला बिग्रिएर थला पर्नुभएका शुरेस बहादुर गुरुङको सहयोगार्थ चितवन समाज इजरायलले २ लाख ४७ हजार १०० रुपैंया, लेट्स डु बेटर देन अदर्सका अभियन्ताहरुले १ लाख ९२ हजार ५३२, माडी ग्रुप जापानबाट ६२ हजार ३७५ र अष्ट्रेलियाका सामाजिक अभियन्ताहरुबाट संकलित रु ५३ हजार गरी कुल ५ लाख ५५ हजार ७ रुपैंया हस्तान्तरण हुन लागेको हो ।
छोरा सुरेशको उपचारको लागि पर्याप्त आर्थिक श्रोत नभएकोले माडी नगरपालिका वडा नं. ७, जगन्नाथपुरीका जंगबहादुर गुरुङको परिवार गहिरो चिन्तामा परेको हो । उहाँको पारिवारिक आर्थिक अवस्था नाजुक रहेको र दुई बर्षदेखि लगातार उपचार गराउँदा सबै पैसा सकिएको गुरुङ परिवारले जनाएको थियो । सुरेशकुमारले चिकित्सकाको सल्लाह अनुसार डाईलाइसिस गराउँदै आउनुभएकोमा तत्कालै मृगौला प्रत्यारोपण गनुपर्ने भएकाले गुरुङ परिवारले आर्थिक सहयोगका लागि स्वदेश र प्रवासमा रहेका सहयोगी मनहरुसँग अनुरोध गरेको थियो । गुरुङलाई सघाउन उहाँको छिमेकी समेत रहनुभएकी चितवन समाज इजरायलकी अध्यक्ष सरिश्मा बरालले चितवन समाज इजरायलमार्फत, कोरियाबाट सुर्य सापकोटा र उमेश गौतम, अष्ट्रेलियाबाट अजय गौतम तथा जापानबाट सुर्य पौडेल र सन्तोष पोखरेलले विशेष पहलकदमी लिनुभएकोमा उपचार खर्च जुटेको हो ।