मध्यपूर्वी माडीको खरकट्टामा टावर ढलेको करीब आधा बर्ष बितिसक्दा पनि मोबाइल सेवा प्रदायक कम्पनी एन.सेल.ले सेवा सुचारु गरेको छैन । गत ज्येष्ठ ३१ गते आएको हावाहुरीले स्थानीय घरको छानो उडाइ ल्याएर सो टावरमा ठोक्किँदा फाइबर निर्मित टावर ढल्न पुगेको थियो । टावर ढल्दै गर्दा सोलार प्यानलहरुमा समेत क्षती पुगेको थियो । टावर र सोलार प्रणाली क्षतीग्रस्त भएसंगै सो टावरमार्फत मोबाइल र इन्टरनेटको सेवा लिइरहेका मध्यपूर्वी माडीका उपभोक्ताहरु प्रभावित भइरहेको स्थानीयबासी मोहन बहादुर भण्डारीले स्वदेश एफ.एम.लाई जनाउनुभयो ।
सरकारी स्वामित्वको नेपाल टेलिकमको सेवा अपेक्षित गुणस्तरीय हुन नसकिरहेको समयमा नीजि क्षेत्रको मोबाइल सेवा प्रलायक एनसेलले १०० फिट उचाइको टावर स्थापना गरी गुणस्तरीय सेवा प्रदान गरिरहेको थियो । टावर मर्मत नगरिँदा माडीको दक्षिण अयोध्यापुरी, कान्तिपुर, इन्द्रबस्ती, बाह्रघरे, सागबारी, गणेशकुञ्ज र चौकीडाँडा लगायतका गाउँमा बसोबास गरिरहेका मोबाइल उपभोक्ताहरुको मोबाइलमा सो कम्पनीको सिमकार्ड भएपनि राम्रो नेटवर्क भने छैन ।
यसैबिच, पूर्वी माडीको दक्षिणी गोबिन्दबस्ती क्षेत्रमा रहेका कान्छी बगहीँ, जेठी बगहीँ र प्याउली तथा कुसुमखोला क्षेत्रहरुमा अझैपनि मोबाइल सेवा पुग्न सकेको छैन । सरकारी वा नीजि स्वामित्वका कुनैपनि मोबाइल सेवा प्रदायकहले सो क्षेत्रहरुमा सेवा पुग्नेगरी टावर नराख्दा आफूहरु सञ्चार सम्पर्कबाटै बिमुख हुनु परिरहेको कान्छी बगहीँ निवासी भरत घिमिरेले गुनासो गर्नुभयो । मोबाइल सेवाको अभावमा जंगली जनावरको आक्रमण, बाढी बिपद् र आकस्मिक अवस्थामा बाहिर सम्पर्क हुन नसक्दा पटक पटक मानवीय क्षती हुनेगरेको हाम्रा उहाँको भनाई छ । (इन्सेटमा घाँसले ढाकिएको वर्तमान अवस्था ।)
