आर्थिक अभावका कारण माडीका खेलाडीहरु अन्तराष्ट्रिय स्तरको मार्सल आर्टस् प्रतियोगितामा सहभागि हुन पाएनन

186
SwadeshPost

फिलिपिन्समा आयोजित अन्तराष्ट्रिय स्तरको मार्सल आर्टस् तालिम एवं प्रतियोगितामा छनौट भएका माडीका दुईजना खेलाडीहरु आर्थिक अभावका कारण काठमाडौंबाटै फर्किनुपरेको छ । करीब ३ बर्षदेखि माडीका विभिन्न ठाउँहरुमा तेक्वान्दो प्रशिक्षण सञ्चालन गर्दै आएको अल मार्सल आर्टस् माडीका खेलाडीद्वय सन्तोष मर्दनीया र जयप्रकाश सहनी आर्थिक अभावका कारण राजधानीबाट फर्किनुपरेको हो । सुरुवातमा प्रतियोगिताको लागि प्रतिव्यक्ति ६० हजार रुपैंया खर्च हुने भनिएकोमा त्यति रकमको जोहो गरी फिलिपिन्स उडानका लागि दुबैजना काठमाडौं पुगेका थिए । तर नेपाली पक्षका व्यवस्थापकले लागत बढेर प्रतिव्यक्ति करीब १ लाख ३० हजार पुगेको जनाएपछि दुबैजना प्रतियोगितामा सहभागी नभई माडी फर्किएका हुन् ।

फिलिपिन्समा आयोजित सो अन्तराष्ट्रिय प्रतियोगितामा नेपालबाट छनौट भएका खेलाडीद्वय मर्दनीया र सहनीलाई माडी नगरपालिका वडा नं. ३ का वडाध्यक्ष पुरन महतोले खादा ओढाई बिदाइ गर्नुभएको थियो । प्रतियोगिता अन्तरगत मर्दनीयाले ४० के.जी. समूहमा तथा सहनीले ४५ के.जी. समूहमा प्रतिस्पर्धा गर्ने तालिका रहेको थियो । आयोजकले भिसा खर्च र खान बस्न व्यवस्था गरेको भएपनि उडान टिकटको खर्च भने खेलाडीलाई नै व्यहोर्न लगाइएपछि दुबैजना फर्किएका हुन् । आर्थिक अभावका कारण काठमाडौंबाटै फर्किनुपरेपछि दुबैजना निराश बनेका छन् । यसअघि तेक्वान्दो खेलाडी मर्दनीयाले थाइल्याण्डमा आयोजित अन्तराष्ट्रिय तेक्वान्दो प्रतियोगितामा सहभागी नेपालका लागि रजत पदक दिलाइसकेका छन् ।

SwadeshPost