माडीका नगरप्रमुख ठाकुर प्रसाद ढकाल नेतृत्वको टोलीले निकुञ्ज सिर्जित तथा अन्य समस्याहरुका बिषयमा प्रधानमन्त्री एवं नेकपाका अध्यक्षद्वयसंग भेटसम्वाद गरेको छ । विगत दुई दिनदेखि राजधानी काठमाडौंमा डेलिगेसनमा रहेको सो टोलीले चितवन राष्ट्रिय निकुञ्जको नियमक २०२९ सालको ऐन शंसोधनका बिषयलाई प्राथमिकतामा राखी केन्द्रीय तहमा भेटघाट गरेको हो ।
छलफलमा निकुञ्ज ऐनको जनपक्षीय संशोधन तथा माडी क्षेत्रमा सडक, पुल आदि निर्माणमा भइरहेको अवरोधका बिषयमा प्रधानमन्त्री एवं नेकपाका अध्यक्षद्वयको गम्भीर ध्यानाकर्षण भएको र त्यसको निदानका लागि उहाँहरु सकारात्मक हुनुभएको नगरप्रमुख ढकालले स्वदेश एफ.एम.लाई जानकारी दिनुभयो । भेटसम्वादमा रीउ करिडोरसंगै बाढीले गरेको क्षतीको पुननिर्माणका बिषयमा समेत सकारात्मक कुराकानी भएको छ ।
टोलीमा नगरप्रमुख संगै नेपाल कम्युनिष्ट पार्टी (नेकपा) माडीका नेताहरु नारदमणी पौडेल, श्याम बिष्ट, प्रेम तिमिल्सिना, नारायण पौडेल, सुमन बराल, दण्डपाणी पौडेल र शिवजी गायक लगायतको सहभागिता रहेको छ । दुईदिन अघि काठमाडौं पुगेको सो टोलीले यसअघि नेपाल सरकारका बन तथा भू-संरक्षण मन्त्री शक्ति बहादुर बस्नेत र बनसचिव डा. विश्वनाथ ओलीसंगै निकुञ्ज विभागका महानिर्देशक र अन्य सरोकारवालाहरुसंग भेटघाट गरेको थियो । भेटमा निकुञ्जको ऐन शंसोधनसंगै बाँदरझुला बस्तीको दीर्घकालीन व्यवस्थापन तथा त्यस रुटबाट सार्वजनिक बस सञ्चालनको कुराकानी भएको जनाइएको नगरप्रमुख ढकालले जनाउनुभयो । (फोटो: श्याम बिष्ट)
