राष्ट्रपति चुरे तराई मधेस संरक्षण विकास समितिले माडीमा सञ्चालन गरिरहेको नदी प्रणाली स्तरिय कार्यक्रम माडी नगरपालिकालाई हस्तान्तरण गरेको छ । आइतबार माडी भिलेज लजमा एक कार्यक्रमबिच समितिले सो कार्यक्रम नगरपालिकालाई हस्तान्तरण गरेको हो । स्थानीय सरकारको आयोजनामा कार्यक्रम गरिने प्राबधान अनुसार राष्ट्रपति चुरे तराई मधेस संरक्षण विकास समितिले ४ करोड ८२ लाख बजेट रहेको ससर्त कार्यक्रम माडी नगरपालिकालाई हस्तान्तरण गरिएको नगरपालिकाले सामाजिक सञ्जालमार्फत सार्वजनिक गरेको हो ।
माडी उपत्यकामा रहेको खहरे तथा साना र मझौला स्तरका नदीहरुमा तटबन्धन, नदी कटान नियन्त्रण र चुरे श्रृङ्खलाको भू-संरक्षणका विभिन्न कामहरुमा सो बजेट परिचालन हुने जनाइएको छ । यसअघि गत भदौमा सो समितिले रीउ नदीको दीर्घकालीन व्यवस्थापनकालागि रीउ नदीको प्रकोप र प्रभाव क्षेत्रको स्थलगत अध्ययन अवलोकन, तथ्यांक संकलन र सरोकारवालाहरुसंग छलफल गरी माडीमा एकीकृत श्रोत व्यवस्थापन योजना निर्माण गरेको थियो ।