कतारको ओक्रा जेलमा कैद भुक्तान गरिरहेका माडीका युवा विनोद रानाभाटलाई स्वदेश फर्काउने अभियानका क्रममा बैंकमा हालसम्म करीब ४९ लाख ५५ हजार रुपैंया संकलन भएको छ ।
रानाभाटको उद्धार तथा रिहाइका लागि गठित विनोद रानाभाट रिहाई तथा उद्धार समितिको आधिकारिक बैंक खातामा सो रकम जम्मा गरिएको हो । खातामा आज युवा समाजसेवी अर्जुन भुसालमार्फत संकलित ५ लाख ८८ हजार २ सय १६ रुपैंया दाखिला भएको हो भने भोलि थप करीब १३ लाख रुपैंया जम्मा गरिन लागिएको भुसालले जनाउनुभयो ।
रानाभाटलाई सहकर्मी भारतीय कामदारले आक्रमण गरेकोमा प्रतिकार गर्दा भारत सनैयाका कामदारको मृत्यु हुन पुगेको थियो । घटना लगत्तै कतार पुलिसले पक्राउ गरी मुद्धा चलाएकामा मृतकको परिवारलाई ब्लड मनीका रुपमा २ लाख ६० हजार कतारी रियल अर्थात करीब ८२ लाख नेपाली रुपैंया बुझाउनुपर्ने आदेश भएको हो । रानाभाटको उद्धारका लागी बिनोद रानाभाट रिहाइ तथा उद्धार समितिको नाउँमा कृषि विकास बैंक माडी शाखामा सञ्चालित ०५०८८०१३३७०९४०१३ नम्बरको खातामा रकम जम्मा गर्न सकिन्छ । हाल उहाँको रिहाई र उद्धारका लागि स्वदेश र प्रवासमा सहयोग संकलन अभियान जारी रहेको छ ।
