५५ औं राष्ट्रिय बालदिवसको अवसरमा माडीको दक्षिण अयोध्यापुरीमा सञ्चालित अन्तर विद्यालय हाजिरी जवाफ प्रतियोगितामा दक्षिण कालीका आधारभूत विद्यालय देबेन्द्रपुरको टोली पहिलो भएको छ ।
प्रतियोगितामा आयोजक समेत रहेको दक्षिण अयोध्यापुरी आधारभूत विद्यालयको टोली दोश्रो र गणेश आधारभूत विद्यालय गणेशकुञ्जको समूह तेश्रो स्थान हासिल गरेको छ भने आधारभूत विद्यालय जगन्नाथपुरीले चौथो (सान्त्वना) स्थान प्राप्त गर्न सफल भएको थियो । प्रतियोगितामा साविक अयोध्यापुरी क्षेत्रका ८ वटा विद्यालयहरुको सहभागिता रहेको थियो ।
सामरी उत्थान सेवाको सहयोगमा दक्षिण अयोध्यापुरी आधारभूत विद्यालयले आधारभूत तहस्तरीय अन्तर विद्यालय हाजिरी जवाफ प्रतियोगिता सञ्चालन गरेको हो । विद्यालय व्यवस्थापन समितिका ज्येष्ठ सदस्य आइतसिंह तामाङको अध्यक्षतामा सम्पन्न सो कार्यक्रममा माडीका नगरप्रमुख ठाकुर प्रसाद ढकालको प्रमुख आतिथ्य र वडाध्यक्ष कृष्णराज अधिकारीको विशिष्ट आतिथ्य रहेको थियो । प्रतियोगिता सकिएलगत्तै डेङ्गु रोगबारे सचेतनामूलक कार्यक्रम समेत गरिएको थियो ।
