निर्माण
सामग्रीहरुको अभाव देखाउँदै माडीको बाटो कालोपत्रे गर्ने काम लम्ब्याउँदै
आएको आशिष निर्माण सेवाले माडीमा पोर्टेबल क्रसर प्लाण्ट स्थापना गर्न
लागेको छ ।
डिभिजन सडक कार्यालय चितवनको सिफारिसमा जिल्ला समन्वय
समिति चितवनले अनुगमन गर्नेगरी माडी नगरपालिकाले आशिष निर्माण सेवालाई
अस्थायी क्रसर प्लाण्ट राख्ने इजाजत दिएको हो । करीब एक महिनामा जडान सकिने
सो प्लाण्टबाट कंक्रिटजन्य निर्माण सामग्रीहरु
तयार भएपश्चात मात्रै बाटो कालोपत्रेको काम सुरु गर्ने कम्पनीको योजना छ ।
तिहार पर्व लगत्तै माडीको मगोई खोला किनारमा थारु संग्रहालय नजिकै प्लाण्ट
स्थापना गरिने आशिष निर्माण सेवा अन्तरगतको भरतपुर माडी ठोरी हुलाकी
बाटोका कन्ट्रयाक्ट म्यानेजर रोहित भट्टराईले जनाउनुभयो ।
कम्पनीले माडीको रीउ पुलदेखि घाँघर खोलासम्म कालोपत्रे बाटो बनाउने ठेक्का
पाएको हो । कालोपत्रे गर्न आवश्यक गिट्टी, बालुवा, कंक्रिट, चिप्स लगायतका
सामानको अभाव देखाउँदै कम्पनीले कालोपत्रेको काम लम्ब्याउँदै आएको छ ।
यसअघि माडी नगरपालिकाको क्रसर प्लाण्टबाट उत्पादन सुरु भएलगत्तै सोही
सामग्रीको प्रयोग गरी बाटो कालोपत्रे गरिने भनिएको थियो । तर नगरपालिकाको
क्रसरले उत्पादन सुरु गरिसकेको अवस्थामा ठेकदार पक्षबाट नयाँ प्लाण्ट
स्थापनाको प्रक्रिया अगाडि बढाइएसंगै बाटो कालोपत्रेको काम थप केहि महिना
पछाडी धकेलिने निश्चित छ । (प्रतिकात्मक फोटो)
