दैनिक ज्याला मजदुरी गरी हातमुख जोड्ने बिपन्न परिवारहरु लकडाउनका कारण झनै समस्यामा परेसंगै उनीहरुलाई खाद्यान्न उपलब्ध गराउन माडी नगरपालिकाले २० लाख रुपैंया निकाशा गरेको छ ।
कोरोनासंग लड्न लकडाउन गरिएकोमा समस्यामा परेका परिवारलाई सघाउन गठित राहत कोषमा दाखिला हुनेगरी नगरपालिकाले सो रकम उपलब्ध गराएको हो । विगतमा बाढीपिडीतको राहतका लागि स्थापित कोषलाई नै साविकको बचत रकमसहित हालको बिपद् राहत कोषमा परिणत गरिएको छ । कोष व्यवस्थापनका लागि रेडक्रसकर्मी भागिरथ बस्यालको संयोजकत्वमा माडीका चारवटै रेडक्रस उपसमितिहरु र नगरपालिकाका सुचना प्रविधिी अधिकृत सम्मिलित सहयोग समिति क्रियाशील छ ।
कोषमा बरुवाका दाना तथा चल्ला व्यवसायी उद्धव थापाबाट ५० हजार तथा सहयोग समितिका संयोजक बस्यालको परिवारबाट २६ हजार रुपैंया दाखिला भइसकेको छ । त्यसैगरी शिक्षक कलिराम महतोले कोषमा ५ हजार ५५५ रुपैंया प्रदान गर्नुभएको छ भने विभिन्न संघसंस्था र व्यक्तिहरुले नगद तथा भौतिक सहयोग जुटाउने प्रतिवद्धता व्यक्त गरेका छन् ।