लामो तथा छोटो दुरीको सार्वजनिक यातायात चल्न सुरु भएसंगै हालसम्म सुरक्षित मानिएको माडी उपत्यकामा कोरोनाको संक्रमण फैलन सक्ने चिन्ता व्यक्त गरिएको छ । सरकारले लामो तथा छोटो दुरीका सवारी साधन र बजार व्यवसाय सञ्चालन खुला गरेसंगै संक्रमित वा संक्रमणको जोखिम स्थानबाट मानिसहरुको खुला आवागमन बढ्ने भएसंगै माडीको समुदायमा कोरोना संक्रमण फैलने सम्भावना बढेको हो ।
माडी नगरपालिकाले उदाहरणीय तवरबाट कोरोनाको संक्रमण नियन्त्रणको पहल लिँदै आएको छ । विगतमा प्रवास र स्वदेशमै पनि अलपत्र परेकाहरुलाई घर फिर्ती, चरणबद्ध राहत वितरण, क्वारेन्टाइन र आइसोलेशन व्यवस्थापन, समुदायस्तमा कोरोना परीक्षण लगायतको काम गरी माडीमा समुदायमा कोरोना फैलन रोकिएको अवस्था छ । कोरोना बिरुद्धको लडाईमा माडी नगरपालिका र सबै नगरबासीहरुले गरेको अथक मिहिनेतका कारण हाल समुदायमा संक्रमण नरहेकोमा सवारी साधनहरु चल्न सुरु भएसंगै परिस्थिति बदलिन सक्ने अनुमान गरिएको हो । यसको बैंकल्पिक व्यवस्था वा उचित व्यवस्थापनमा सरोकारवाला निकायको तत्कालै ध्यान पुग्नु जरुरी रहेको माडीबासीहरु बताउँछन् ।
