देशकै प्रमुख दुरसञ्चार एवं इन्टरनेट सेवा प्रदायक नेपाल टेलिकमले माडी नगर क्षेत्रमा समेत अप्टिकल फाइबरको कनेक्सन जोड्न लागेको छ । माडी उपत्यकामा अप्टिकल फाइबर कनेक्सन पु-याउन हाल चितवन राष्ट्रिय निकुञ्जभित्र ड्रेनेज (नाली) खन्ने र पुर्ने काम जारी रहेको हो ।
फाइबर बिछ्याउन आवश्यक सम्पूर्ण कानुनी प्रकृया पुरा गरी निकुञ्जको कसरा पोष्टबाट फाइबर तार बिछ्याउने कार्य सुरु गरिएको हो । आउँदो एक साताभित्र कसराबाट माडीको बनकट्टासम्म अप्टिकल फाइबरको कनेक्सन पुगिसक्ने नेपाल टेलिकमले जनाएको छ ।
अप्टिकल फाइबरको कनेक्सन भएपश्चात टेलिकमले माडीमा ए.डि.एस.एल.संगै फाइबर टु द होम प्रविधिमा आधारित उच्च गतिमा इन्टरनेट सेवा प्रदान गर्न सक्नेछ । त्यसैगरी हाल माडीको जि.एस.एम. र सि.डि.एम.ए. नेटवर्कका लागि मौलाकालिकाको डाँडाबाट रेडियो लिंकमा निर्भर रहेको टेलिकमले सेवालाई गुणस्तरीय बनाउँदै फोर जी सेवा सुरुवात गर्ने टेलिकमको केन्द्रीय प्राविधिक टोलीले जानकारी दिएको छ ।
