रुकुम घटनाका मृतकहरुप्रति श्रद्धाञ्जली अर्पण गर्दै माडीमा जातीय भेदभाव तथा छुवाछुत उन्मूलन दिवस मनाइएको छ । नेपालमा बि.सं. २०६३ साल जेष्ठ २१ गते सरकारले नेपाललाई जातीय छुवाछूत मुक्त राष्ट्र घोषणा गरेको स्मरणमा हरेक बर्ष जेष्ठ २१ गतेलाई जातीय भेदभाव तथा छुवाछुत उन्मूलन दिवसका रुपमा मनाउने गरिन्छ ।
माडी नगरस्तरीय दलित समिति, न्यायका लागि संयुक्त दलित संघर्ष समिति, राष्ट्रिय दलित पत्रकार संघ माडी र सुनचाँदी व्यवसायी संघ माडी शाखासंगै बसन्तपुर बजारका युवा क्लबहरुको सहभागितामा बसन्तपुर बजारमा शान्तिपूर्ण -यालीसहित मौन धारण र दीप प्रज्वलन समेत गरी दिवस मनाइएको हो । कार्यक्रमकै सन्दर्भमा तात्कालीन माओवादी जनयुद्धमा समाहित हुँदा मारिनुभएका माडी ब्रह्मपुरीका शहीद तिलक खातीको सम्झनामा समेत दीप प्रज्वलन गरिएको थियो ।
तर दिवसको सन्दर्भमा रुकुमेली युवाहरु र दलित समुदायका शहीदको स्मरण भइरहँदा माडीकै दुई अबोध दलित किशोरीहरु दिपीका सुनार र दीपशीला परियारको संकाश्पद बलात्कार र हत्याको बिरोधमा दीप प्रज्वलन भएको भने देखिएन । दीपिका दिपशीलाको रहस्यमय मृत्यु भएको ३ बर्ष पुरा भइसक्दा पनि घटनाको सत्यतथ्य बाहिर आउन, दोषी पत्ता लाग्न र कानुनी कारवाही हुन सकेको छैन ।
