भरतपुर महानगरपालिका वडा नं. १५ मा निर्माणाधीन गौतमबुद्ध अन्तरराष्ट्रिय क्रिकेट रंगशालाको करिब २० प्रतिशत काम सम्पन्न भएको छ। संघीय र प्रदेश सरकारको सहकार्यमा महानगरले निर्माण गरिरहेको रंगशालाको काम हिमालयन कालिञ्चोक बिबिआर जेभी कम्पनीमार्फत तीव्र गतिमा भइरहेको हो।
अहिले १७० जना कामदार दैनिक खटिएको तथा चारमध्ये एक प्याराफिटको ढलान सकिएको र अन्य संरचनाहरूको ढलानको तयारी भइरहेको डिभिजनल इन्जिनियर सन्तोष आचार्यले जानकारी दिनुभयो।
महानगर प्रमुख रेनु दाहालले सम्झौताअनुसार तालिकामा काम भइरहेको र आवश्यक सहजीकरण महानगरले गरिरहेको बताउँदै, निर्माण कार्य समयमै सम्पन्न हुनेमा विश्वास व्यक्त गर्नुभयो ।
रु ७८ करोड ५० लाख लागतमा निर्माण भइरहेको रंगशाला २०८३ पुस २२ गतेभित्र सम्पन्न गर्ने लक्ष्य छ। संघीय र प्रदेश सरकारले क्रमशः ३०% र ७०% लागत व्यहोरेका छन्। अन्तर्राष्ट्रिय मापदण्डअनुसार निर्माण भइरहेको रंगशालामा भविष्यमा अन्तर्राष्ट्रिय खेल आयोजना गर्ने लक्ष्य लिइएको छ।
