चितवन, १५ असार ०८३ — भरतपुर महानगरपालिका वडा नं. २४ मा सम्पन्न ‘महिला फुटबल प्रतियोगिता’मा बसन्तपुर युनाइटेड क्लबको महिला टोलीले शानदार प्रदर्शन गर्दै उपाधि जित्न सफल भएको छ।
फाइनलमा आयोजक भरतपुर–२४ लाई कडा प्रतिस्पर्धामा १–० गोल अन्तरले हराउँदै बसन्तपुर युनाइटेड च्याम्पियन बन्न सफल भएको हो। फाइनल खेलको निर्णायक गोल कप्तान साहारा छेत्रीले गरेकी थिइन्।
त्यसअघि, सेमिफाइनल खेलमा बसन्तपुर युनाइटेडले दीप वेभ एकेडेमीलाई २–१ गोल अन्तरले पराजित गर्दै फाइनलमा स्थान बनाएको थियो। उक्त खेलमा टोलीका कप्तान साहारा छेत्री र आशिका गुरुङले गोल गर्दै जित सुनिश्चित गरेका थिए।
प्रतियोगितामा पुरस्कार र प्रमाणपत्र प्रदान गर्दै भरतपुर २४ का वडाध्यक्ष राम गोदारले उत्कृष्ट प्रदर्शन गर्ने सबै खेलाडीहरूको मेहनत र समर्पणप्रति धन्यवाद व्यक्त गर्नुभयो । विजेता टोलीलाई बधाई दिँदै आगामी दिनहरूमा अझ उत्कृष्ट प्रदर्शन गर्दै अघि बढ्न पनि उहाँले शुभकामना व्यक्त गर्नुभयो।
