चितवन, २० असार ०८३ — साविक विजेता अर्जेन्टिनाले फिफा विश्वकप २०२६ को अन्तिम ३२ अन्तर्गत केप भर्डेलाई अतिरिक्त समयमा ३–२ ले पराजित गर्दै अन्तिम १६ मा स्थान सुरक्षित गरेको छ।
मियामी स्टेडियममा भएको अत्यन्तै रोमाञ्चक खेलमा निर्धारित ९० मिनेट १–१ को बराबरीमा सकिएपछि खेल अतिरिक्त समयमा पुगेको थियो। अर्जेन्टिनाका कप्तान लियोनल मेस्सीले २९औँ मिनेटमा गोल गर्दै टोलीलाई अग्रता दिलाएका थिए। तर ५९औँ मिनेटमा डेरोय डुआर्टेले बराबरी गोल फर्काउँदै खेललाई १–१ को अवस्थामा पुर्याए।
अतिरिक्त समयको दोस्रो मिनेट (९२औँ मिनेट) मा लिसान्द्रो मार्टिनेजले गोल गर्दै अर्जेन्टिनालाई पुनः २–१ को अग्रता दिलाए। तर १०३औँ मिनेटमा सिड्नी काब्रालले गोल गर्दै केप भर्डेलाई फेरि २–२ को बराबरीमा ल्याए।
खेल पेनाल्टी सुटआउटतर्फ उन्मुख भइरहेका बेला अतिरिक्त समयको १११औँ मिनेटमा केप भर्डेका डिनेय बोर्जेसबाट आत्मघाती गोल हुन पुग्यो। सोही गोल अर्जेन्टिनाको जितको निर्णायक आधार बन्यो।
विश्व वरीयताको दोस्रो स्थानमा रहेको अर्जेन्टिनालाई ५९औँ वरीयताको केप भर्डेले अन्तिमसम्म कडा चुनौती दिएको थियो। पराजित भए पनि केप भर्डेले प्रतियोगिताभर देखाएको साहसिक प्रदर्शनका कारण समर्थकहरूको प्रशंसा बटुलेको छ।
यस जितसँगै अर्जेन्टिनाले फिफा विश्वकप २०२६ को अन्तिम १६ मा स्थान बनाएको छ। अब अर्जेन्टिनाले क्वार्टरफाइनल प्रवेशका लागि इजिप्टसँग प्रतिस्पर्धा गर्नेछ।
— — —
