चितवन, ५ मंसिर, २०८३ । कोसी प्रदेशमा बालबालिकाविरुद्ध हुने हिंसा, यौन दुर्व्यवहार र बालविवाह गम्भीर चुनौतीका रूपमा देखिएका छन् । प्रदेशको सामाजिक विकास मन्त्रालयले सार्वजनिक गरेको ‘कोसी प्रदेशका बालबालिकाको स्थिति प्रतिवेदन–२०८३’ अनुसार बालबालिकाविरुद्ध हिंसा तथा यौन दुर्व्यवहारका ७५९ मुद्दा दर्ता भएका छन् ।
दर्ता मुद्दामध्ये जबरजस्ती करणीका मात्रै ५१२, बाल यौन दुरुपयोगका ११४ र जबरजस्ती करणी उद्योगका ८३ घटना छन् । कुल मुद्दामध्ये ६७५ फछ्र्यौट भएका छन् भने ८४ मुद्दा बाँकी छन् ।
त्यस्तै, आर्थिक वर्ष २०८२/८३ मा सुनसरी, मोरङ र संखुवासभामा बालविवाहसम्बन्धी ६९ उजुरी परेका छन् । प्रदेशका १३७ स्थानीय तहमध्ये हालसम्म पाँच स्थानीय तह मात्रै पूर्ण बालमैत्री घोषणा भएका छन् ।
प्रतिवेदनले शिक्षा र स्वास्थ्य क्षेत्रमा सुधार देखिए पनि बालसंरक्षण, हिंसा नियन्त्रण र बालमैत्री शासनमा अझै चुनौती रहेको औँल्याएको छ ।










