घरछेउको टौवामा उम्रिएका च्याउ खाएका माडी सेरुवा निवासी एकै परिवारका तीनजनामा बिरामी भई अस्पताल भर्ना भएका छन् ।
गएसाँझ घरसंगैको परालको टौवामा पलाएको च्याउको चटनी खाएका उनीहरु (नाम गोप्य)लाई गएराती अचानक पेट दुख्ने, बान्ता हुने लगायतका लक्षण देखिएसंगै आकस्मिक रुपमा बघौंडा अस्पताल भर्ना भएका थिए । अस्पतालले फुड प्वाइजनिङ भएको निष्कर्ष सहित तत्कालै उपचार सुरु गरेको थियो । हाल बिरामीहरुको अवस्थामा सुधार आइरहेको अस्पतालले जनाएको छ ।
व्यवसायिक रुपमा उत्पादन भएको बाहेक अन्य जंगली च्याउहरु बिषालु हुनसक्ने भएकाले च्याउ खाँदा विशेष ध्यान दिनुपर्ने हुन्छ । २०२५ थरीका च्याउका प्रजाति मध्ये १ सय १० प्रकारका मात्र खान योग्य च्याउ र १०० प्रकारका विषालु च्याउ छन् । जंगल र बारीमा उम्रिने विषालु च्याउ खाँदा ज्यान जानसक्ने भएकाले जंगली च्याउ छुँदै नछुन स्वास्थ्यकर्मीहरुको सुझाव छ । नेपालमा विषालु च्याउका कारण वर्षेनी ३० जना भन्दा बढीको मृत्यु हुने गरेको छ ।