माडीको बरुवास्थित सोमेश्वर माध्यमिक विद्यालयमा अध्ययनरत किशोरीहरु लैंगिक हिंसा रोक्न सिकाउने आत्मरक्षा तालिममा सहभागी भएका छन् ।
शिक्षा विकास निर्देशनालय बागमती प्रदेश हेटौंडाको सहयोगमा विद्यालयले माध्यमिक तहमा अध्ययनरत २१ जना किशोरी (छात्रा)हरुलाई सहभागी गराउँदै लैंगिक हिंसा रोकथाम सम्बन्धी आत्मरक्षा तालिम सञ्चालन सुरु गरेको हो ।
एक सातासम्म चल्ने सो तालिममा छात्राहरुले महिला हिंसाबाट बच्न, हिंसाको प्रकारबारे जानकारी पाउन र आफूमाथि आक्रमण भएमा कसरी प्रतिरक्षा गर्ने भन्ने विषयमा शारीरिक तथा सैद्धान्तिक तालिम पाउने विद्यालयका सहप्रधानाध्यापक युवराज लामिछानेले जानकारी दिनुभयो ।
तलिमका क्रममा लैंगिक हिंसा हुनुको कारण, कानुनी उपचार र घटना भइहाले कसरी न्यायका लागि लड्न सकिन्छ भन्ने विषयमा पनि किशोरी छात्राहरूलाई प्रशिक्षण दिइने सह-प्रधानाध्यापक लामिछानेको भनाई थियो ।
