चितवन । भारतको गढ्वालमा गएको पहिरोमा परी सो स्थानमा कार्यरत माडीका ३ सहित ४ जना मजदुरहरुको मृत्यु भएको छ ।
भदौ ६ गते भारतको उत्तराखण्ड राज्यस्थित गढ्वालमा गएको पहिरोमा परी माडी-२ सितलपुरका अन्दाजी ५८ बर्षका तुलबहादुर दमै, माडी-१, भङ्गताका अन्दाजी २६ बर्षका कृष्ण बहादुर परियार र माडी-५, छरछरेका अन्दाजी २८ बर्षका पूर्ण बहादुर नेपालीको मृत्यु भएको हो ।
पछिल्लो ६ महिनादेखि सडक निर्माण मजदुरका रुपमा गढ्वाल क्षेत्रमा कार्यरत उनीहरु बुधबार पहिरोमा परेका थिए । मृतकका शवहरू हाल पोष्टमार्टमका लागि स्थानीय अस्पतालमा राखिएको र आगामी ३ दिनपछि माडी ल्याउने मृतकका परिवारले जनाएको छ ।
